Cairde

Osclaíodh an Teach Solais don phobal i 2016 ag tairiscint lóistín i dteachíní bunaidh na gcoimeádaithe solais agus turais threoraithe ar an teach solais. Forbraíodh é leis an aidhm shoiléir aige, leas an phobail a chur chun cinn agus tairbhí pobail a sholáthar – ó thaobh an gheilleagair, na sochaí, an chomhshaoil agus an chultúir de.

I gceantar a bhí ag brath ar fheirmeoireacht bheag agus ar iascaireacht, agus ina bhfuil meath ag teacht ar an daonra, is é an aidhm atá againn ná leas a bhaint as an turasóireacht agus í a fhorbairt mar acmhainn áitiúil inbhuanaithe, bunaithe ar shuíomh íocónach Theach Solais Fhánada. Tá muid tiomanta d’fhorbairt pobail agus fiontraíochta agus do chruthú fostaíochta, agus is mór againn oidhreacht agus cultúr saibhir teanga an cheantair agus cuireann muid chun cinn iad.

Tá maoin an tí solais i seilbh an phobail áitiúil trí léas fadtéarmach ó Choimisinéir Soilse na hÉireann. Tá muid mar chuid de chuibhreannas Theach Solais Mór na hÉireann agus i measc na bpríomhpháirtithe leasmhara eile tá Comhairle Contae Dhún na nGall, Fáilte Éireann agus Údarás na Gaeltachta.
Mar sin féin, tá feidhmiú Theach Solais Fhánada mar thionscadal turasóireachta pobail faoi stiúir an phobail áitiúil tríd an gcomhlacht neamhbhrabúis Forbairt Fhánada CTR. Tá sé mar aidhm ag an chomhlacht an úsáid inbhuanaithe is fearr a bhaint as an teach solais agus as acmhainní nádúrtha an cheantair chun Fánaid a chomhdhlúthú agus a fhás mar phobal Gaeltachta inmharthana le deiseanna agus caighdeán maith maireachtála do chách. Tá gach gné den tionscadal bunaithe ar leas an phobail agus baintear úsáid as na buntáistí go léir a fhaightear tríd an tionscadal, chun ár gceantar a fheabhsú.

Cuimsíonn eispéireas foriomlán an tionscadail tírdhreach iontach agus muirdhreach Leithinis Fhánada ina iomláine agus Teach Solais íocónach Fhánada mar phointe fócasach aige. I suíomh den sórt sin, tuigeann muid an fhreagracht atá orainn turasóireacht athghiniúnach a chur chun cinn agus cuireann muid prionsabail na hinbhuanaitheachta agus an gheilleagair chiorclaigh chun cinn ar gach leibhéal le linn an tionscadail.

Agus an foirgneamh stairiúil tí solais seo á chaomhnú agus á chothabháil mar acmhainn pobail tháirgiúil, leanfaidh bonneagar an tí solais a d’fhreastal ar an réigiún trína chuspóir tosaigh ó 1817, ag déanamh amhlaidh trína chuspóir nua go ceann blianta fada le teacht.

Tá muid fréamhaithe i nGaeltacht Fhánada, ceantar le hoidhreacht shaibhir teanga a shíneann siar thar na mílte bliain. Tá ár n-ionad oibre dátheangach agus tá ár bhfoireann sásta seirbhís trí Ghaeilge a chur ar fáil. In éineacht leis an ghrúpa áitiúil teanga, Gaeltacht Bheo Fhánada, reáchtálann muid féilire imeachtaí i rith na bliana, ag caomhnú agus ag léiriú meas ar an ghné tábhachtach seo dár gceantair, cultúr agus oidhreacht.

Bunaíodh Teach Solais Fhánada Cairde Fhánada mar ardán chun cumas a thabhairt do raon daoine leasmhara, sa bhaile agus thar lear, cuidiú go gníomhach le pobal Fhánada Tionscadal Theach Solais Fhánada a fhorbairt mar fhiontar sóisialta.

Tá an tacaíocht seo ag cuidiú leis an fhorbairt leanúnach agus oibríocht inmharthana an tí solas mar acmhainn ag tabhairt buntáiste do Fhánaid agus phobail níos leithne i nDún na nGall. Is píosa lárnach é Cairde agus leanfaidh sé ar aghaidh mar phíosa lárnach ag tabhairt cumas don phobal a fhís, a aidhmeanna agus a chuspóirí a bhaint amach maidir leis an phobal a fheabhsú agus a chothú – ó thaobh an gheilleagair, na sochaí, an chomhshaoil agus an chultúir de.